ԱՄՆ-ը ԼՂ կարգավիճակի հարցը լուծված չի համարում. դեսպան Թրեյսի

ԱՄՆ-ը ԼՂ կարգավիճակի հարցը լուծված չի համարում. դեսպան Թրեյսի

Միացյալ Նահանգները Լեռնային Ղարաբաղի կարգավիճակի հարցը լուծված չի համարում,-այս մասին այսօր լրագրողների հետ զրույցում հայտարարել է Հայաստանում ԱՄՆ դեսպան Լին Թրեյսին՝ մեկնաբանելով հարցը, թե արդյոք Վաշինգթոնը տեսնում է ԵԱՀԿ Մինսկի խմբի համանախագահությամբ հայ-ադրբեջանական բանակցությունների վերսկսման հնարավորություն:
Դեսպանի խոսքով՝ Միացյալ Նահանգները, որպես Մինսկի խմբի համանախագահ, անում է ամենը, որպեսզի կողմերը վերադառնան բանակցությունների սեղանի շուրջ՝ Մինսկի խմբի համանախագահության հովանու ներքո, քանի որ կարծում է, որ խաղաղության և անվտանգության այդ հիմնախնդիրները պետք է լուծվեն դիվանագիտական ճանապարհով:

«Պետքարտուղար Բլինքենը տարբեր առիթներով շատ հստակ շարադրել է մեր այս հանձնառությունը: Դա, իհարկե, շատ բարդ խնդիր է: 30 տարվա պատերազմի և լարվածության իրավիճակը չի կարող հանգուցալուծվել մեկ գիշերվա ընթացքում: Այդուհանդերձ, մենք հասկանում ենք, որ կան որոշ հիմնախնդիրներ, որոնք պետք է լուծվեն, և դրանցից մեկը, ինչպես նախկինում եմ ասել, այն է, որ մենք Լեռնային Ղարաբաղի կարգավիճակի հարցը լուծված չենք համարում և, հետևաբար, կշարունակենք պահել այդ հարցը Մինսկի խմբի օրակարգում», — ասել է դեսպան Լին Թրեյսին: