Մենք շահագրգռված ենք Երևան-Բաքու հարաբերությունների կարգավորման հարցում. Սերգեյ Լավրով

ՌԴ արտաքին քաղաքական գերատեսչության ղեկավարն Ադրբեջանի նախագահ Իլհամ Ալիևի հետ հանդիպման ժամանակ հայտարարել է, որ Հարավային Կովկասում տրանսպորտային հանգույցի ստեղծման հարցերը կարող են հիմք դառնալ Երևան-Բաքու հարաբերությունների կարգավորման համար՝ փոխանցում է ТАСС գործակալությունը:

«Մենք անկեղծորեն շահագրգռված ենք Հայաստանի ու Ադրբեջանի միջև հարաբերությունների կարգավորման հարցում: Կարծում ենք՝ ձգձգվող հակամարտությունից դուրս գալու տնտեսական ասպեկտների վրա կենտրոնանալու համատեղ աշխատանքն օպտիմալ շրջանակներ է ստեղծում»,- հայտարարել է Լավրովը:

«Մարդիկ պետք է զգան, որ այդ գործընթացը տեղի է ունենում, իրավիճակն իրապես կարգավորվում է: Ռուսաստանի, Ադրբեջանի և Հայաստանի փոխվարչապետները երեք երկրների ղեկավարների կողմից ստեղծած աշխատանքային խմբի շրջանակում պարբերաբար հանդիպում են, քննարկում են գործնական ասպեկտները՝ կապված Հարավային Կովկասում բոլոր տնտեսական ու տրասնպորտային հաղորդակցությունների ապաշրջափակման վերաբերյալ ղեկավարների պայմանավորվածությունների հետ»,- նշել է Սերգեյ Լավրովը:

ՌԴ արտգործնախարարի խոսքով՝ դա չափազանց լուրջ տրանսպորտային հանգույց է, որը մեծ նշանակություն է ունենալու նաև տարածաշրջանային շրջանակներից դուրս: