Խաչատուրյան քույրերը տուժող են ճանաչվել Միխայիլ Խաչատուրյանի դեմ բացված սեռական բռնության մասին քրգործի շրջանակներում

Իրենց հոր սպանության մեջ մեղադրվող Խաչատուրյան քույրերի պաշտպանները հույս են հայտնել, որ աղջիկների նոր՝ տուժողի կարգավիճակը հոր կողմից սեռական բռնության և ծեծի ենթարկվելու մասին գործով թույլ կտա նրանց խուսափել քրեական հետապնդումից: Ինչպես փոխանցում է «ՏԱՍՍ» գործակալությունը, այս մասին հայտնել է փաստաբան Ալեքսեյ Պարշինը:

ՌԴ Քննչական կոմիտեն պաշտոնապես հայտնել է Միխայիլ Խաչատուրյանի դեմ քրեական գործ հարուցելու մասին: Ինչպես փաստաբանները հայտնել են, այդ գործով իրենց պաշտպանյալները տուժողներ են համարվում:

Այժմ Խաչատուրյանի գործով նախատեսվում է լիարժեք նախաքննություն իրականացնել, որի ընթացքում քննությունն ապացույցներ կհավաքի նրա կողմից իրականացված հանցագործության վերաբերյալ: Նախաքննության ավարտին գործը կուղարկվի դատարան:

«Եթե Միխայիլի դեմ քրեական գործը հասնի դատարան, և նրան մեղավոր ճանաչեն աղջիկների դեմ հանցագործություններ կատարելու համար, ապա մենք կստանանք հերթական, անհերքելի ապացույցը, որ Խաչատուրյան քույրերը գտնվել են անհրաժեշտ պաշտպանության իրավիճակում», — ասել է փաստաբան Ալեքսեյ Լիպցերը:

Հիշեցնենք, որ 2020 թվականի փետրվարին քննությունը հրաժարվել էր քրեական գործ հարուցել Խաչատուրյանի դեմ՝ պայմանավորված նրա մահվամբ: Դեկտեմբերին Մոսկվայի Բասմանյան դատարանն այդ որոշումն անօրինական է ճանաչել: Քննության ընթացքում ստացված նյութերի համաձայն՝ 2014 թվականի նոյեմբերից, ինչպես նաև մոր բացակայությամբ համատեղ բնակության ողջ ընթացքում Խաչատուրյանը կոշտ վերաբերմունքի է արժանացրել դուստրերին, պարբերաբար նրանց ծեծի է ենթարկել, սպառնացել է և ստիպել սեռական բնույթի գործողություններ անել: Միխայիլ Խաչատուրյանին իր բնակարանում սպանված են գտել 2018 թվականի հուլիսի 27-ին: