Փաշինյանի քծնանքն ԱՄՆ պետքարտուղարին, Ալիևի հետ վաղվա հանդիպումն ու ընդդիմության զգուշացումը

Փաշինյանի քծնանքն ԱՄՆ պետքարտուղարին, Ալիևի հետ վաղվա հանդիպումն ու ընդդիմության զգուշացումը

Քիչ առաջ հայտնի դարձավ, որ վարչապետ Փաշինյանն արդեն մեկնել է Բրյուսել: Հիշեցնենք՝ վաղն այստեղ կայանալու է  Եվրոպական խորհրդի նախագահ Շառլ Միշելի, Իլհամ Ալիևի և Փաշինյանի եռակողմ հանդիպումը։

Մինչ այդ, ըստ կառավարության տարածած հաղորդագրության, կայացել է ԱՄՆ պետքարտուղար  Էնթոնի Բլինքենի և ՀՀ վարչապետի հեռախոսազրույցը:

,,Փաշինյանը և Բլինքենն անդրադարձել են Հարավային Կովկասում տեղի ունեցող գործընթացներին, Լեռնային Ղարաբաղի շուրջ լարվածության աճին: Նիկոլ Փաշինյանը ներկայացրել է ադրբեջանական ստորաբաժանումների գործողությունների հետևանքով Արցախում ստեղծված իրավիճակը, հումանիտար խնդիրները ու կարևորել ԱՄՆ-ի հասցեական արձագանքը,,-ասված է հաղորդագրության մեջ:

Կողմերը կարևորել են տարածաշրջանում կայունության և խաղաղության ապահովումը՝ ընդգծելով ԵԱՀԿ Մինսկի խմբի համանախագահության կարևորությունը: Անդրադարձ է կատարվել նաև վաղը Բրյուսելում կայանալիք եռակողմ հանդիպմանը:

Ու թեև ասվածից հետևում է, որ պետքարտուղար Բլինքենի զանգը գերազանցապես կապված էր Լեռնային Ղարաբաղի խնդրի հետ, մասամբ՝ նաև ուկրաինական իրադարձությունների, նույն՝ կառավարական տեքստում ասվում է.  ,,Նիկոլ Փաշինյանը շնորհակալություն է հայտնել ամերիկյան կողմին՝ ժողովրդավարական բարեփոխումների ուղղությամբ Հայաստանին աջակցություն ցուցաբերելու համար և նշել, որ ժողովրդավարության հետագա ամրապնդումը ՀՀ կառավարության որդեգրած քաղաքականությունն է,,:

Մինչ Փաշինյանը, ինչ-ինչ մտահոգություններից ելնելով շողոքորթում է ԱՄՆ պետքարտուղարին, Ազատության հրապարակում մեկնարկել է ընդդիմադիր Պատիվ ունեմ և Հանրապետություն խմբակցությունների համատեղ հանրահավաքը: Նախկին նախագահներ Սերժ Սարգսյանի և Ռոբերտ Քոչարյանի ղեկավարած այս ուժերը բավական զգացմունքային ու ըմբոստ ելույթներ են ունենում: Նրանք վկայակոչում են Նիկոլ Փաշինյանի պարտվողական քաղաքականության հետևանքները, այն, որ նրա օրոք Արցախի և Հայաստանի սահմանների վերաձևում է լինում՝ հօգուտ Ադրբեջանի և հայտարարում, որ անընդունելի է Արցախը Ադրբեջանի կազմում  որևէ կարգացիվակ:

Վանկարկումներ էին լինում նաև ,,Առանց Նիկոլ Հայաստան,,, ,,Նիկոլ՝ դավաճան,, բովանդակությամբ:  Արդարացիորեն պնդելով, որ գործող վարչախումբն ի զորու չէ սպասարկել հայաստանյան ու արցախյան շահը, հայտարարվեց ամեն գնով այս ոչ հայանպաստ ընթացքն ու դերակատարներին կանգնեցնելու անհրաժեշտության ու վճռականության մասին:

ՀԱՆՐԱՀԱՎԱՔԻ ԵԶՐԱՓԱԿԻՉ ՔԱՂԱՔԱԿԱՆ ՀԱՅՏԱՐԱՐՈՒԹՅՈՒՆԸ

Հանուն Հայաստանի եւ Արցախի պաշտպանության հրավիրված հանրահավաքի մասնակիցներս, անկախ մեր գաղափարաբանական եւ քաղաքական տարբերություններից, վճռականորեն մերժում ենք թուրք-ադրբեջանական տանդեմի կողմից պարտադրվող օրակարգերը։ Խաղաղության նախադրյալներ ստեղծելու համար Ադրբեջանը պետք է վերադարձնի հայ ռազմագերիներին, պատանդներին, այլ պահվող անձանց, ազատազրկման դատապարտվածներին, իր զորքերը հեռացնի ինչպես Հայաստանի ինքնիշխան տարածքներից, այնպես էլ Արցախի տարածքում 2020–ի նոյեմբերի 9–ի դրությամբ դիրքերին:

Մենք՝ հանրահավաքի մասնակիցներս,  հայտարարում ենք, որ առաջնորդվում ենք հետեւյալ հիմնարար սկզբունքներով.
— հաստատել, որ Հայաստանի Հանրապետությունն Արցախի ժողովրդի անվտանգության եւ ինքնորոշման իրավունքի իրացման երաշխավորն է՝ բոլոր բաղադրիչներով,
— բացառել  Արցախի որեւէ կարգավիճակ Ադրբեջանի կազմում,
— բացառել առանց Հայաստանի հետ հուսալի ցամաքային կապի Արցախի անկլավային վիճակը,
— քայլեր ձեռնարկել 1994 թ. ԵԱՀԿ գագաթաժողովի որոշմամբ ամրագրված ձեւաչափով եւ նպատակներով բանակցային գործընթացի վերականգնման ուղղությամբ,
— բացառել Հայաստանի ինքնիշխանության եւ տարածքային ամբողջականության հաշվին հաղորդակցության ուղիների ապաշրջափակման անվան տակ միջանցքների տրամադրումը,
— Ադրբեջանի կողմից ուժի կիրառման եւ ուժի կիրառման սպառնալիքի պայմաններում բացառել ցանկացած միջպետական պայմանագրի ստորագրում եւ սահմանազատման ու սահմանագծման ցանկացած գործընթաց,
— չստորագրել Ադրբեջանի հետ որեւէ պայմանագիր, որը կխափանի Արցախի ինքնորոշման իրավունքի՝ առանց սահմանափակումների իրացումը,
— Հայաստան-Թուրքիա հարաբերություններում բացառել որեւէ համաձայնություն, որը հարցականի տակ կդնի հայ ժողովրդի հայրենազրկման եւ ցեղասպանության իրողությունը, ինչպես նաեւ հայության հոգեւոր-մշակութային ժառանգության կրողը լինելու իրավունքը։

Նանե Մակուչյան